（123）138弄 上海人“开ABC”了！
上海人侪讲上海言话，朋友之间聊天，啥人要是来一句普通话，旁边人就会讲“哟！开国语啦！”
尼克松来上海后，上海人“开ABC”了。
迭次仁仁回上海，奇怪地发现有的上海人见面打招呼不是讲“哎，侬好，饭吃过啦？” 而是讲“哈啰，哈啰”了, 连酒甏看到伊也讲“哈啰，妹妹侬回来过春节啦？” 以前不是迭恁咯！
一天，仁仁照姆妈的吩咐去给裁缝阿祥送纽襻，阿祥师傅老感激，接过纽襻，笑嘻嘻跟仁仁讲“生发油买来买去！生发油买来买去！”仁仁搞不懂了！
碰到晶晶，一讲，晶晶笑得眼泪水也要出来了，“啊呀呀，伊跟侬开ABC，讲英文啊！‘生发油买来买去！’就是‘Thank you very much！’”
仁仁哪恁想得到裁缝阿祥跟伊开ABC！
“侬大惊小怪做啥？现在老行咯！”晶晶讲，“现在连小菜场卖葱姜刮鱼鳞的阿婆有辰光也会跟侬讲，‘哈喽，哈喽，鱼鳞刮好了，拿去！”
过了几天，仁仁到小六子爷烟纸店买搽手甘油，小六子娘站柜台，对仁仁讲：
“甘油卖光了，阿拉‘黑市板凳’去进货了。”
仁仁想了半天，哦，小六子娘也开ABC了，“黑市板凳”大概就是“husband”了！
这天，夜饭后，四个小姑娘又聚在晶晶房间里聊天。仁仁讲了迭几天的经历，发表看法：
“呒么想到，迭两年变化嘎大，连酒甏、裁缝阿祥、小六子娘侪‘开ABC’了！阿拉上海人真的老开放，老会赶时髦，样样新事物信手拈来。不过言话讲过来，阿拉上海人其实对英语一点不陌生。记得爹爹老早讲过，20年代，南京路上永安公司等四大公司就开始出售国外进口的日用品，比如：棕榄香皂、桂格燕麦、克林奶粉、西门子电器、派克金笔、莱卡相机、飞利浦收音机，还有打字机、加热器、冰箱等等，侪是外国进口。这些公司招聘售货员有个规定，应聘者必须会讲粤语、沪语、国语，还要能听懂能讲些英语或日语。”
“阿拉阿爷讲，老早，上海高档点的饭馆跑堂叫‘boy’，伊拉看见外国人来吃饭，会得讲几句混腔势洋泾浜。阿拉阿爷还讲，淮海路，以前叫霞飞路辰光，那里的邮差、三轮车夫、黄包车夫为了讨生活，侪会像八哥那样照外国人的讲法讲几句洋泾浜英语。比如：“Good Morning”，伊拉含混地读成‘狗的猫银’。”
“‘狗的猫银’！哈哈哈哈！哪恁给伊拉想出来咯！”囡囡忍不住笑了。
“洋泾浜英语覅太多嗷！倷讲得出伐？阿拉晓得交关，喏：Sofa—沙发、roof window—老虎窗、cement—水门汀、Lysol—来苏尔消毒水、spring—司不灵锁、stick—司的克、butter—白脱油、Russian soup—罗宋汤……。”晶晶要考考大家。
“阿拉晓得老早可口可乐刚刚在上海上市的辰光，叫‘蝌蚪啃蜡’！”文颖得意地插一句。
“我也晓得交关！””囡囡抢着讲，“喏：马达、太妃糖、白兰地、香槟、拷贝、模特儿、高尔夫……侪不是用上海言话讲洋文的洋泾浜！”
“还有，”晶晶不肯示弱，“上海人白相的扑克牌，英文不就是poker吗？阿拉阿爷是不准阿拉白相扑克牌咯。不过我晓得扑克牌四种花色的洋泾浜：黑桃，spade叫斯派特、红心，heat叫哈特、方块，diamond叫大门，梅花，club叫克勒白。上次我去‘小耳朵’屋里，伊拉屋里有客人，小耳朵讲伊拉在白相‘圈的温，我搞了半天才明白原来伊拉在白相‘twenty-one’, 倷讲搞伐，啥人听得懂迭种洋泾浜英语啊？”
“晶晶，侬哪恁晓得的嘎清爽？侬老实坦白，侬啊有背着侬阿爷打扑克牌啊？”仁仁朝晶晶做只鬼面孔，“老实交代，不然，阿拉去告诉侬阿爷啦！”
“好唻，倷有空哦，比赛啥人洋泾浜晓得多！”文颖看看仁仁，又看看大家，“现在不行讲洋泾浜了，现在上海人侪在一本正经学英语了！我倒有新闻告诉倷！前两天，我路过酒甏门口，伊喊牢我，跟我讲，现在电台开始教外国言话了……。”
“电台教外语了？”囡囡诧异地插嘴。
“侬不晓得啊？！迭个已经不是新闻了！尼克松访华后，北京人民广播电台就开始有《业余外语广播讲座》了。现在，上海电台也有英语广播教程了，可以讲，现在人人学英语！”
“酒甏讲，伊，还有小六子爷，裁缝阿祥侪想请阿拉奶奶教伊拉屋里的几个小人学外国言话，就是学外语。问我，阿拉奶奶会得愿意伐。我昨日就和奶奶讲了，阿拉奶奶呒么意见，就是有点担心，现在年纪大了不晓得有精力教伐，再讲，伊牙齿落脱几颗，怕讲英语漏风。叫我每次回上海，帮伊一道教迭些小人。”
“看来，现在刮学英语的风了，就是不晓得阿拉还有机会到学堂里去读书，读英文伐？”仁仁伤感地低声说。
“我也想再读书。”文颖的声音更低。
大家低头，不语。
